Artes Escénicas

Fernando Castro Paredes, asturiano residente en Cee, deuse a coñecer nos últimos anos no ámbito da dramaturxia gañando os Premios Rafael Dieste ou o I Certame de Textos Teatrais Roberto Vidal Bolaño para público adolescente. Pero Fernando Castro xa tiña navegado no teatro no ámbito do teatro escolar e afeccionado. Agora falamos das súas últimas pezas premiadas e editadas, 'Amorodo Agre' (Deputación da Coruña) e 'A derradeira bala' (Editorial Galaxia). Dous estilos moi diferentes, dous tons opostos, dúas mostras da versatilidade dun autor que sabe moverse da comedia farsesca e absurda ao drama social con profundidade simbolista e cáustico. Un comentario de Roberto Pascual.

Roberto Pascual fálanos de José Luis Baós de Cos, dramaturgo, premio Abrente da MIT en 2019 e premio Roberto Vidal Bolaño en 2020 coa obra ‘A Cámara Escura’.

No aniversario do decreto do estado de alarma pola COVID, ButacaZero estrea 32m2. Coméntanolo Roberto Pascual: “Espectáculo oportuno ou oportunista? Unha concesión popular ou unha ollada mordaz sobre o que o confinamento puxo de relevo sobre as desigualdades? Esther Carrodeguas crea un texto ao que lle senta moi ben o traballo musical de Rodrigo Cuevas ou o deseño de Beatriz de Vega”.

Roberto Pascual fai mención da estrea de ‘Soga e Cinsa: Tríptico teatral para 11 bruxas en 101 minutos’, da compañía Aporía Escénica. “Unha peza moi ben documentada sobre a persecución a moitas mulleres acusadas de bruxería. Un espectáculo para gozar das imaxes, do espazo sonoro, e da reflexión sobre a sensibilidade e intelixencia de moitas mulleres sobre remedios naturais”.

Roberto Pascual dedica o seu comentario teatral á obra ‘SÓS‘, da compañía Malasombra, unha reflexión sobre a soidade non desexada na última etapa da vida.

Roberto Pascual fálanos do texto teatral ‘As mil vidas de Dorotea‘, escrito por Lorena Conde para público infantil e xuvenil. Un libro editado por Cuarto de inverno e con ilustracións de María Brenn.

Roberto Pascual valora unha produción da compañía A Feroz. ‘Do pracer e da morte’ é a súa particular visión da praga da peste que asolagou Europa na Idade Media.

‘Terceiro acto’, a obra do Centro Dramático Galego, é motivo de comentario do noso colaborador en artes escénicas Roberto Pascual.

ArtesaCia estrea en Tui o seu espectáculo, 'Illas desertas', unha obra transmedia sobre o fracaso e a necesidade de afrontar o inútil con música e cinema en directo. Un comentario do noso colaborador Roberto Pascual.

‘#2 Pilgrims’ é o novo espectáculo de Redrum Teatro que levará a Sheyla Fariña e a Guillermo Carbajo por diferentes vilas galegas. O propósito? Pois chegar a Santiago, claro, pero tamén reflexionar sobre o Camiño, a igualdade e as novas masculinidades. Cóntanos máis o noso colaborador Roberto Pascual.

Roberto Pascual achéganos a nova obra da compañía Redrum Teatro. ‘Un home con lentes de pasta’, comedia negra catalá con texto de Jordi Casanovas.

Voadora propón unha versión do ‘Othello’ de Shakespeare na MIT de Ribadavia, coprodutora xunto co Teatro de La Abadía de Madrid, onde representou a obra durante varias semanas. Co foco nos ciumes, na posverdade, no feminicidio, na islamofobia, este ‘Othello’ é un hashtag irreverente, visual e musical que esencializa e xoga libremente coa obra do dramaturgo inglés para enfado de puristas e ledicia de quen busca unha escena atrevida e de impacto sobre temas actuais. Un comentario de Roberto Pascual.

Roberto Pascual cóntanos todo sobre 'Fábulas da montaña', obra na que Concepción Arenal repasa a súa infancia en Ferrol e o posterior traslado a Armaño, Cantabria, trala morte do seu pai. Alí, na convivencia cos animais da casa e ante o respecto de lobos e osos, escribe o seu libro Fábulas en verso orixinais. Historias onde destaca a súa loita polos dereitos das mulleres, das clases desfavorecidas e a defensa da educación como medio para conseguir a Igualdade. En escena a actriz Larraitz Urruzola interpreta a Concepción Arenal, que cos títeres na súa saia-teatriño presenta momentos da súa mocidade e as súas fábulas. Merran Laginestra, no papel de amiga da escritora, interpreta en directo temas populares e de Marcial de Adalid, compositor galego coetáneo da ferrolá e alcumado “O Chopin Español”. Segundo as ilustracións da época, a saia-teatriño, na que unha muller era sempre a titiriteira, foi un recurso escénico utilizado nas veladas das clases ilustradas do século XIX. Con esta proposta queremos recuperar e incorporar ao corpus dramático galego este valioso patrimonio teatral esquecido.

Na colaboración de Roberto Pascual falamos do libro 'O tsunami', de Marcos Abalde Covelo (Premio Abrente de textos teatrais 2020). Este premio sae do prelo na colección da Editorial Difusora. O autor define a súa peza como unha comedia perversa, unha sátira política, a definición da aniquilación, un delirio, unha pornografía social.

O noso colaborador de artes escénicas, Roberto Pascual, é tamén o director da Mostra Internacional de Teatro de Ribadavia. Pasou polo Diario Cultural para contarnos os segredos da edición deste 2021.

Roberto Pascual achéganos ao texto teatral merecedor do III Premio Laudamuco. ‘A vinganza de Fortimbrás’, de Francisco Antonio Vidal Blanco, é a historia deses personaxes secundarios que merecen atención. Unha reinterpretación do mito de Hamlet e a perda de Elsinor con inspiración tamén na obra de Cunqueiro e adaptada á sociedade galega actual.

‘A contenda dos labradores de Caldelas. Entremés famoso sobre a pesca no río Miño’ é a primeira peza teatral en galego. Este ano é o 350 aniversario desta obra de Gabriel Feijoo de Araujo, e sobre ela cóntanos máis Roberto Pascual.

Nesta colaboración de Roberto Pascual, é quenda do teatro de monicreques para adultos. ‘República sideral’, de Esther F. Carrodeguas, unha farsa esperpéntica que parte da declaración da República Federal Independente da Illa de Arousa durante unhas horas en outubro de 1934. E ‘Ultramarinos Finisterrae’, de María Lado, que relata a desaparición do último ultramarinos da Costa da Morte e a súa reconversión nun hostal con encanto, co fondo sempre da especulación. Dúas obras que tratan temas actuais partindo da nosa memoria.

O TEATRO ESTÁ FEITO

TEATRO DE GUIÑOL